धेरै रकम प्रस्ताव गर्ने स्मेकलाई परामर्शदाता चयन गरिँदा राज्यलाई अतिरिक्त भार बढाएको महालेखाको ठहर
नलसिंहगाड जलविद्युत् आयोजनाको परामर्शदाता छनोटमा राज्यलाई २४ करोड ११ लाख रुपैयाँ अतिरिक्त दायित्व थपिएको छ । ४ सय १० मेगावाटको आयोजनाको परामर्शदाता छनोटका क्रममा संयुक्त मूल्यांकनका आधारमा सामान्य अंक बढी प्राप्त गर्ने कम्पनी छनोट गरको भन्दै त्यसमा राज्यलाई दायित्व बढेको ठहर महालेखा परीक्षकको कार्यालयले गरेको हो ।
आयोजनाको परामर्शदाता छनोटको अन्तिम प्रतिस्पर्धामा स्मेक इन्टरनेसनल र एएफसी–एचसिइएनइएसएस थिए । प्रतिस्पर्धाका क्रममा स्मेकले ८१.९९४ अंक र एएफसी–एचसिइएनइएसएसले ८१.५०१ अंक प्राप्त गरेको भए पनि स्मेकले धेरै रकम प्रस्ताव गरेको थियो ।
स्मेकले १ अर्ब ९ करोड र एएफसी–एचसिइएनइएसएसले ८४ करोड ८९ लाख रुपैयाँ प्रस्ताव गरेको र धेरै रकम प्रस्ताव गर्ने स्मेकलाई परामर्शदाता चयन गरी राज्यलाई अतिरिक्त भार बढाएको महालेखाले ठहर गरेको हो ।
विशेष अदालतमा पहिले नै मुद्दा
आयोजनाको परामर्शदाता छनोटमा अनियमितता गरेको भन्दै अख्तियार दुरुपयोग आयोगले आयोजनाका कार्यकारी निर्देशक मोतीबहादुर कुँवरसहित ६ जनाविरुद्ध विशेष अदालतमा भ्रष्टाचार मुद्दा दायर गरिसकेको छ । परामर्शदाता छनोट प्रतिस्पर्धामा २७ करोड २४ लाख ५४ हजार रुपैयाँ भ्रष्टाचार गरेको भन्दै अख्तियारले २० चैतमा विशेष अदालतमा मुद्दा दायर गरेको थियो ।
अख्तियारले कुँवरसहित तत्कालीन सिनियर डिभिजनल इन्जिनियर सूर्यप्रसाद रिजाल, तत्कालीन लेखा अधिकृत आनन्दप्रसाद चापागाईं, ऊर्जा मन्त्रालयका सिनियर डिभिजनल इन्जिनियर गोकर्णराज पन्थ, विद्युत् विकास विभागका तत्कालीन कानुन अधिकृत राजकुमार थापा र स्मेकका आधिकारिक प्रतिनिधि उदीपलाल श्रेष्ठविरुद्ध १३ करोड ६२ लाख रुपैयाँ जरिवाना र एक वर्ष कैदको मागदाबी गरेको छ ।
लेखा समितिको छुट्टै अनुसन्धान
नलसिंहगाडको परामर्शदाता छनोटमा अनियमितता भएको भन्दै संसद्को सार्वजनिक लेखा समितिले पनि अनुसन्धान गरिरहेको छ । लेखा समितिले सांसद मीना पुनको संयोजकत्वमा छानबिन समिति नै बनाएर त्यसको अध्ययन गरिरहेको छ ।
स्रोत:नयाँपत्रीका