काठमाडौं। नेपाल विद्युत प्राधिकरणका कार्यकारी निर्देशकमा कुलमान घिसिङ नियुक्त भए पछिको छ महिनामा साढे चार प्रतिशत बिन्दुले विद्युत चुहावट नियन्त्रण भएको छ। भदौमा कार्यभार सम्हालेयता चुहावट नियन्त्रणमा ‘एग्रेसिभ’ कारवाही अघि बढाएका घिसिङले माघसम्ममा उक्त उपलब्धि हासिल भएको जानकारी दिए।
चालु आर्थिक बर्षको पहिलो छ महिनामा (साउन-पुष) भने चुहावट ३.६३* प्रतिशत बिन्दुले घटेको छ। गत वर्ष साउन देखि पुषसम्ममा २०.३८ प्रतिशत रहेको चुहावट अहिले १६.७५ प्रतिशतमा झरेको हो। गत बर्षसम्म प्राधिकरणको बार्षिक चुहावट २७ प्रतिशत हाराहारी थियो। साउन देखि पुषसम्म बिजुली नै कम उपलब्ध हुने हुँदा चुहावट समेत घट्ने गरेको थियो।
यसपाली भने अटुट बिजुली दिँदा पनि चुहावट न्यूनीकरण गर्न प्राधिकरण सफल भएको हो। यसरी साउनदेखि पुषसम्मको अवधिमा चुहावट १७.८१ प्रतिशतले घटेको छ। बार्षिक आँकडा अनुसार भने साढे दुई प्रतिशत बिन्दुले चुहावट नियन्त्रण भएको प्राधिकरणका कार्यकारी निर्देशक घिसिङले जानकारी दिए। यसरी छ महिनामा चुहावट बापतको सवा अर्ब रुपैयाँ प्राधिकरणले बचाएको छ।
पोखरामा गत वर्षकै जति १४ प्रतिशत चुहावट कायमै छ।
काठमाडौं र अत्तरिया क्षेत्रिय कार्यालय अन्तर्गतको वितरणमा भने चुहावट सामान्य बढेको छ। काठमाडौंमा गत वर्ष ११.३१ प्रतिशत रहेको चुहावट यो वर्ष ११.३७ प्रतिशत पुगेको छ। त्यस्तै अत्तरिया क्षेत्रमा पनि गत वर्ष १३.२५ प्रतिशत रहेको चुहावट यो वर्ष १३.३१ प्रतिशत पुगेको छ। काठमाडौंमा नियमित विद्युत आपूर्ति हुँदा प्राविधिक कारणले नै चुहावट सामान्य तलमाथि हुनसक्ने अधिकारीले बताए।
