सौर्य विद्युत्तमा स्थानीयवासीलाई शेयर

    1377

    २६ भदौ, तनहुँ । तनहुँको शुक्लागण्डकी नगरपालिका–५ बेलचौतारामा सोलारबाट उत्पादन गर्न लागिएको विद्युतमा स्थानीयवासीलाई शेयर दिइने भएको छ ।

    सोलार फर्म प्रालिले स्थानीयवासीलाई रु २० करोडको शेयर वितरण गर्ने तयारी गरेको छ । कम्पनीका प्रबन्धक तिलबहादुर आलेले कम्पनीमा स्थानीयवासीका साथै गैरआवासीय नेपालीको समेत शेयर रहने बताए ।

    गैरआवासीय नेपालीलाई रु २० करोड तथा संस्थापकलाई रु १० करोडको शेयर उपलब्ध गराइने उनले जानकारी दिए । करीब रु ५० करोड लागतको पाँच मेगावाट क्षमताको उक्त आयोजनामा विद्युत् उत्पादन गर्न २३ हजार प्यानल राखिनेछ ।
    आयोजनाबाट वार्षिक ९० लाख युनिट विद्युत् उत्पादन हुने आले बताउनुहुन्छ । उक्त विद्युत् खरीदका लागि नेपाल विद्युत् प्राधिकरणसँग सम्झौता भइसकेको छ ।

    कम्पनीका व्यवस्थापक हरिकुमार श्रेष्ठले आगामी ०७६ भदौ महिनाभित्र विद्युत् उत्पादन गर्ने योजना रहेको बताए । ‘छिट्टै काम शुरु हुन्छ,’ उनले भने ।

    सोलारबाट उत्पादित विद्युतलाई ग्रिड प्रणालीबाट राष्ट्रिय प्रशारण लाइनमा जोडिने छ । सो कम्पनीले भानुभक्त क्याम्पसको १०० रोपनी जग्गा २५ वर्षका लागि भाडामा लिएको छ ।कम्पनीले क्याम्पसलाई वार्षिक रु १३ लाख भाडा तिर्नेछ । सोलार विद्युत् खरीदका लागि प्राधिकरणसँग प्रतियुनिट सात रुपैयाँ ३० पैसाका दरले २५ वर्षसम्म विद्युत् खरीद गर्ने सम्झौता भएको कम्पनीले जनाएको छ ।

    स्रोत: अन्लाईनखबर