१० बैशाख, २०७६
निजी क्षेत्रको नेतृत्वमा निर्माण हुने मिनि ग्रिड ऊर्जा पहुँच आयोजनाका लागि विश्व बैंकले साढे ८४ करोड सहयोग गर्ने भएको छ ।
चार वर्षभित्र खर्च गर्ने गरी १७.२१ मिलियन डलर लागतमा सञ्चालन हुन लागेको आयोजनाका लागि विश्व बैकले ७.६१ मिलियन डलर अर्थात् ८४ करोड ५२ लाख रुपैयाँ सहयोग गर्ने भएको हो । सोमबार अर्थ मन्त्रालय वैदेशिक महाशाखा प्रमुख एवं सहसचिव श्रीकृष नेपाल र विश्व बैंकका निमित्त देशीय प्रबन्धक विज्ञान प्रधानबीच सम्झौता भएको छ ।
ऊर्जा पहुँच आयोजनाका लागि विश्व बैंकको रणनीति जलवायु कोष (एससीएफ) ले ५.६१ मिलियन डलर अनुदान र २ मिलियन डलर ऋणका साथै सरकारले ६ मिलियन डलर अनुदान र निजी क्षेत्रले बाँकी ३.६० मिलियन डलर बेहोर्ने विश्व बैंकले जनाएको छ । वैकल्पिक ऊर्जा प्रवद्र्धन केन्द्रले कार्यान्वयन गर्ने आयोजना अन्र्तगत माइक्रो-मिनि जलविद्युत् र सौर्य ऊर्जाका परियोजना सञ्चालन हुनेछन् । आयोजना अन्तर्गत १ लाख २६ हजारलाई ग्रामीण जनता र ८० व्यापारिक आयोजना सञ्चालन हुनेछन् । आयोजनाले २५ मिनिग्रिडका आयोजनामार्फत ३.८ मेगावाट विद्युत् उत्पादन गर्नुका साथै हालका मिनिग्रिडको पुनःस्थापना र पुनर्निर्माणमा सहयोग गर्ने लक्ष्य राखिएको छ ।
सहसचिव नेपालले विश्व बैंकको सहयोगले नवीकरणीय र अफ ग्रिड ऊर्जा प्रणालीको नेपालमा विकासका लागि ठूलो सहयोग पुग्ने बताउँदै नवीकरणीय ऊर्जामा निजी क्षेत्रलाई सरकारले सहभागिता बनाउन लागेको र यो सम्भव भएको बताए । निमित्त प्रबन्धक प्रधानले ऊर्जाको अवस्था सुर्धानका लागि निजी क्षेत्रको सहभागिता महत्वपूर्ण भएको बताउँदै ग्रामीण समुदायमा स्वच्छ ऊर्जाका लागि विश्व बैंकले सहयोग गरेको बताए ।
स्रोत:कारोबार
