त्रिशूली थ्री एको विद्युत् असारमा

Upper Trisuli 3A

रसुवा — माथिल्लो त्रिशूली थ्री ए जलविद्युत् आयोजनाले असारसम्ममा विद्युत् उत्पादन गर्ने गरी निर्माणमा तीव्रता दिएको छ ।

रसुवामा बाँध र नुवाकोटमा विद्युत्गृह रहेको आयोजनाको क्षमता ६० मेगावाट छ । नेपाल विद्युत् प्राधिकरणले निर्माण गरिरहेको यो आयोजना रन अफ रिभर प्रणालीमा आधारित छ । अहिले विद्युत्गृह, बाँधस्थल, बालुवा थिग्राउने र पानी बग्ने क्यानल निर्माणको काम धमाधम भइरहेको छ ।

आयोजनाले अहिलेसम्म करिब ९० प्रतिशत काम सम्पन्न गरिसकेको जनाएको छ । आयोजनाका अनुसार सिभिलतर्फ ९५ प्रतिशत, इलेक्ट्रो मेकानिकलतर्फ ३५ र हाइड्रो मेकानिकलतर्फ ६५ प्रतिशत काम सम्पन्न भइसकेको छ ।

आगामी असारसम्ममा विद्युत् उत्पादन गर्ने गरी काम भइरहेको आयोजनाका प्रमुख फणिन्द्रराज जोशीले बताए । ‘सबैको साथ र सहयोग भए चालु आर्थिक वर्षको अन्तिममा विद्युत् उत्पादन गर्न सकिन्छ,’ उनले भने, ‘मुख्य सुरुङ मार्गमा कंक्रिट लाइनिङ गर्ने काम पनि धमाधम भइरहेको छ ।’ ४ हजार १ सय मिटर लामो मुख्य सुरुङ मार्गमा कंक्रिट लाइनिङ गर्ने काम अन्तिम चरणमा पुगेको छ ।

आयोजनाको मुख्य सुरुङ मार्ग ०७४ भदौमै ब्रेकथ्रु भएको हो । आयोजनाको निर्माण कम्पनी चाइना गेजुवा ग्रुप अफ कम्पनी (सीजीजीसी) ले काम गरिरहेको छ । सन् २०११ मा आयोजना निर्माण सुरु भएको हो । २०७२ वैशाख १२ को भूकम्पका कारण आयोजनामा क्षति पुगेको थियो । करिब २२ महिना आयोजना बन्दभएको थियो ।

भारतले गरेको नाकाबन्दी र बिनाशकारी भूकम्पका कारण आयोजनाको निर्माण तालिका प्रभावित भए पनि आयोजनाको लागत भने नबढ्ने जोशीले बताए । (ईपीसी) मोडेलमा आयोजनाको निर्माणकार्य भइरहेको छ । चिनियाँ एक्जिम बैंकको सहुलियतपूर्ण ऋणमा निर्माण भइरहेको उक्त आयोजनाको कुल लागत १२५ मिलियन अमेरिकी डलर (१३ अर्ब ९९ करोड १२ लाख ५० हजार रुपैयाँ) रहेको छ ।

निर्माणतालिका प्रभावित भएपछि नेपाल विद्युत् प्राधिकरणले आयोजनाको म्याद ०७६ को वैशाख १७ सम्मका लागि थपेको छ । असार अन्तिमसम्ममा दुईवटा टर्बाइनबाट ३०–३० गरी ६० मेगावाट विद्युत् उत्पादन हुने आयोजानले जनाएको छ । उत्पादित विद्युत् थ्री बी हबदेखि मातातीर्थ सबस्टेसनसम्म करिब ४४ किलोमिटर लामो २२० केभी प्रसारण लाइनमार्फत लगिनेछ ।

प्रसारण लाइनका लागि १ सय ४० वटा टावर निर्माण गर्नुपर्नेमा अहिलेसम्म १ सय ३९ वटा निर्माण भइसके पनि मुअब्जाका कारण थ्री बी नजिकै रहेको टावर अहिलेसम्म निर्माण हुन सकेको छैन । विद्युत् उत्पादन समयमै भए पनि प्रसारण लाइन समयमै निर्माण हुन सकेन भने उत्पादन भएको विद्युत् खेर जाने सम्भावना छ ।
बलराम घिमिरे
स्रोत:कान्तिपुर