संयुक्त कार्ययोजना बनाइने

    50

    नेपाल–चीन ऊर्जा संयन्त्रको पहिलो बैठक आज
    ऊर्जा क्षेत्रमा सहकार्य गर्नका लागि गठित नेपाल र चीनबीचको ऊर्जा संयन्त्रको पहिलो बैठक शुक्रबार (आज) काठमाडौँमा बस्दैछ । गत असार ५ देखि १० गतेसम्म प्रधानमन्त्री केपी शर्मा ओलीले गर्नुभएको चीन भ्रमणको क्रममा भएको सहमतिअनुसार ऊर्जा क्षेत्रका सहकार्य अघि बढाउनका लागि गठित संयन्त्रको बैठक बस्न लागेको हो । ऊर्जा क्षेत्रमा सहकार्य गर्नका लागि गठित नेपाल र चीनबीचको ऊर्जा संयन्त्रको पहिलो बैठक शुक्रबार (आज) काठमाडौँमा बस्दैछ । गत असार ५ देखि १० गतेसम्म प्रधानमन्त्री केपी शर्मा ओलीले गर्नुभएको चीन भ्रमणको क्रममा भएको सहमतिअनुसार ऊर्जा क्षेत्रका सहकार्य अघि बढाउनका लागि गठित संयन्त्रको बैठक बस्न लागेको हो । बैठकका लागि चिनियाँ टोली बिहीबार काठमाडौँ आइपुगेको छ । शुक्रबार बस्ने बैठकमा दुवै देशको विद्युत्मा माग र आपूर्तिको अवस्था, भविष्यको प्रक्षेपण र विकासको अवस्था बारे जानकारी आदानप्रदान गरी संयुक्त कार्ययोजना बनाउने लक्ष्य राखिएको ऊर्जा, जलस्रोत तथा सिँचाइ मन्त्रालयका प्रवक्ता दिनेश घिमिरेले जानकारी दिए । “दुवै देशको अहिले ऊर्जाको अवस्था र भविष्यको प्रक्षेपणबारे प्रस्तुत गरेर अघि बढ्नसक्ने सम्भावनालाई लक्षित गरी कार्ययोजना निर्माण गर्ने लक्ष्य राखिएको छ,” उनले भने । बैठकमा नेपालको तर्फबाट ऊर्जासचिव अनुपकुमार उपाध्याय र चीनको तर्फबाट इन्टरनेसनल इकोनोमिक डिपार्टमेण्टका उपमहाप्रबन्धक हि याङले नेतृत्व गर्नेछन् । बैठकमा दुई देशको ऊर्जाका अवस्थाबारे जानकारी आदानप्रदानपछि सम्भावित लगानीबारे समेत छलफल हुनेछ । यसअघि नै प्रधानमन्त्रीको चीन भ्रमणको क्रममा गल्छी–रसुवागढी–केरुङ ४०० केभी अन्तरदेशीय प्रसारण लाइन निर्माणका विषयमा भएको सहमतिबारे समेत छलफल हुने कार्यक्रम छ । प्रसारण लाइनतर्फ भने अन्य सम्भावित अन्तरदेशीय लाइनका साथै प्रधानमन्त्रीको भ्रमणको क्रममा लगानीका लागि नेपालले प्रस्ताव गरेका नलगाढ, नौमुरे, किमाथांका, सुनकोशी–२ र ३, तमोर र फुकोट कर्णाली जलविद्युत् आयोजनाबारे समेत छलफल हुने कार्यक्रम छ । हालै चीनको बेइजिङमा भएको नेपाल–चीन जोड्ने ४ सय केभीको गल्छी–रसुवागढी–केरुङ अन्तरदेशीय प्रसारणलाइन आयोजनाको कार्यान्वयनका लागि गठित संयुक्त प्राविधिक समूहको पहिलो बैठकसमेत बसेको थियो । बैठकमा अन्तरदेशीय प्रसारण लाइनको वित्तीय व्यवस्थापनको प्रारूप तयार लगायतका विषयमा छलफल भएको थियो । सो प्रसारण लाइनतर्फ नेपालतर्फ गल्छीदेखि रसुवागढीसम्म ७० किलोमिटर छ भने चीनको सिगात्छदेखि रसुवागढीसम्म करिब ६ सय किलोमिटर छ । चीनतर्फ ५०० केभी र नेपालतर्फ ४०० केभीको प्रसारण लाइन प्रस्ताव गरिएको छ ।

    स्रोत:कारोबार