काठमाडौं, १९ जेठ
३० मेगावाटको राहुघाट जलविद्युत्् आयोजना निर्माण सुरु हुन नसक्दा विद्युत् प्राधिकरणले सिभिल ठेकेदारलाई १४ करोड २१ लाख ७६ हजार रुपैयाँ क्षतिपूर्ति तिर्नुपर्ने भएको छ ।
परामर्शदाता छनोटमा भारतीय दूतावासबाट भएको ढिलाइका कारण ठेकेदार कम्पनीलाई काम दिन नसक्दा प्राधिकरणले क्षतिपूर्ति तिर्नुपर्ने भएको हो । आयोजना भारतीय एक्जिम बैंकको सहुलियतपूर्ण ऋणमा बन्न लागेकाले परामर्शदाताको स्वीकृति भारतले गर्नुपर्ने अनिवार्य व्यवस्था छ । आयोजनाको ठेकेदार भारतीय कम्पनी आइभिआरसिएल हो ।
भारतीय दूतावासबाट भएको ढिलाइका कारण सिभिल ठेक्कासम्झौता कार्यान्वयनमा आएको २२ महिनापछि परामर्शदाता छनोट भएको थियो । सोही अवधिको क्षतिपूर्ति प्राधिकरणले ठेकेदारलाई तिर्नुपर्ने भएको हो ।
प्राधिकरण सञ्चालक लक्ष्मणप्रसाद अग्रवाल संयोजकत्वको समितिले ठेकेदारसँग वार्ता गरी १४ करोड २१ लाख ७६ हजार रुपैयाँलाई ठेक्कासम्झौताको व्यवस्थाअनुसार २५ प्रतिशतसम्म मूल्यवृद्धि सीमा राख्ने समझदारी गरेको थियो । प्राधिकरण र कम्पनी सञ्चालक समितिको बैठकबाट पारित भएपछि समझदारी कार्यान्वयनमा आउने व्यवस्था गरिएको थियो ।
तर, ठेकेदार कम्पनी आइभिआरसिएलको सञ्चालक समितिले क्षतिपूर्तिबापतको रकम २५ प्रतिशतसम्म मूल्यवृद्धिको सीमामा राख्न नहुने निर्णय गरेको छ ।
अग्रवालले ठेकेदार कम्पनीको सञ्चालक समितिको निर्णय शुक्रबार प्राप्त भएको जानकारी दिए । ‘१४ करोड २१ लाख ७६ हजार क्षतिपूर्ति दिए पनि यसलाई २५ प्रतिशत मूल्यवृद्धिको सिलिङमा राख्ने समझदारी गरेका थियौँ । तर, ठेकेदार कम्पनीको सञ्चालक समितिले रकम २५ प्रतिशतको सीमामा नराखी छुट्टै क्षतिपूर्तिका रूपमा दिनुपर्ने निर्णय गरेको जानकारी आएको छ,’ अग्रवालले भने ।
उनले छुट्टै क्षतिपूर्ति दिने या २५ प्रतिशतको सिलिङमै समेट्ने भन्ने विषयमा ठेकेदार कम्पनीसँग पुन: वार्ता गरिने बताए । ०६७ कात्तिकमा ठेकेदार छनोट र ठेक्कासम्झौता २ अर्ब ४५ करोड रुपैयाँमा भएको थियो । परामर्शदाता ०६९ साउनमा छनोट भई मंसिरमा परिचालन भएको थियो । प्राधिकरण र ठेकेदार कम्पनीबीच एकवर्षे अवधिमा ३८.४ प्रतिशत काम भएको गणना गरी ठेक्कासम्झौतामा भएको व्यवस्थाका आधारमा १५ प्रतिशत मूल्य समायोजन गर्ने समझदारी भएको थियो ।
सोही व्यवस्थाअनुसार १४ करोड २१ लाख ७६ हजार रुपैयाँ दिने २५ प्रतिशतकै सीमामा समायोजन गर्ने समझदारी बनेको हो । आयोजनाको काम १५ मंसिरदेखि सुरु भएको आयोजनाको काम सिभिल संरचना ठेकेदार परिचालन भएको ४२ महिना अर्थात १८ जेठ ०७३ मा सक्ने नयाँ मिति तय गरिएको छ ।
– सचेन गौतम/नयाँ पत्रिका
