०७५ मा सुरू भएको आयोजना निर्माण ०७७ पुससम्म सक्ने सम्झौता छ
रुकुमपूर्व — जिल्लामा पाँच मेगावाट क्षमताको रुकुमगाड जलविद्युत् आयोजना निर्माणलाई तीव्रता दिइएको छ । सिस्ने गाउँपालिका–५ देउराली ओडारनजिक विद्युत्गृह निर्माण भइरहेको छ । सिस्ने–५ चोरखोलामा बनाइएको ड्यामबाट नहर निर्माण गरेर देउराली ओडार पुर्याइएको छ । राप्ती हाइड्रो एन्ड जनरल कन्स्ट्रक्सन लिमिटेडले निर्माण गरिरहेको आयोजनामा भौतिक निर्माणका धमाधम छन् ।
आयोजनाको हेडवर्क्समा ७०, पाइपलाइनमा ७५, विद्युत्गृहमा १५, इलेक्ट्रोनिक मेकानिकलमा ४०, हाइड्रोलिक मेकानिकलमा ६०, प्रसारण लाइनमा ५० र अन्य विभिन्न काम ९० प्रतिशत सकिएको राप्ती हाइड्रोले जनाएको छ । ‘खण्डखण्डमा काम भइरहेको छ,’ राप्ती हाइड्रोका प्रतिनिधि किरणशंकर घिमिरेले भने, ‘आयोजनाको ६० प्रतिशत काम सकिएको छ ।’ फरकफरक निर्माण कम्पनीले काम गरिरहेका छन् । पाइपलाइन, विद्युत्गृह निर्माण, सामग्री खरिदलगायत काम ठेक्कामार्फत भइरहेका हुन् । राप्ती हाइड्रोले भौतिक पूर्वाधारको कामको अनुगमन गरिएको छ ।
